Izraeli ka nisur një operacion të zgjeruar ushtarak në jug të Libanit, duke goditur mbi 2,000 objektiva të Hezbollahut dhe shkatërruar dhjetëra depo armësh, me qëllim dobësimin e kësaj milicie të financuar nga Irani. Ushtria izraelite ka nisur sulme tokësore dhe ajrore, ndërsa ministri i Mbrojtjes, Israel Katz, urdhëroi shkatërrimin e urave mbi lumin Litani për të izoluar jugun e Libanit dhe për të penguar transportin e armëve dhe përforcimeve të Hezbollahut. Shefi i Shtabit të Përgjithshëm izraelit, Ejal Zamir, deklaroi se operacioni është afatgjatë dhe do të vazhdojë derisa të eliminohet kërcënimi nga kufiri dhe të sigurohet qetësia për banorët e veriut të Izraelit. Presidenti libanez Joseph Aoun reagoi i alarmuar, duke dënuar sulmet si shkelje të sovranitetit të Libanit dhe paralajmëroi për një përshkallëzim të rrezikshëm që mund të çojë në një pushtim tokësor.