Konflikti mes Iranit, rebelëve Huthi dhe përfshirja e SHBA-së dhe Izraelit po krijon një situatë të tensionuar në Detin e Kuq, duke vënë në presion Kanalin e Suezit dhe ekonominë e Egjiptit. Sulmet e Huthive ndaj transportit detar dhe kërcënimet për bllokimin e ngushticës Bab al-Mandab kanë detyruar shumë kompani të shmangin këtë rrugë strategjike, duke shkaktuar humbje të mëdha financiare për Kajron. Sipas të dhënave, të ardhurat nga kanali ranë nga 10.25 miliardë dollarë në vitin 2023 në rreth 4 miliardë dollarë në 2024, ndërkohë që numri i anijeve që kaluan u përgjysmua. Egjipti po përpiqet të ruajë stabilitetin ekonomik dhe politik përmes diplomacisë dhe ndërmjetësimit, duke mbajtur marrëdhënie të mirë me shtetet e Gjirit dhe duke shmangur përplasjet direkte me Iranin, por ndikimi i tij në zhvillimet rajonale mbetet i kufizuar.