Lideri i Koresë së Veriut, Kim Jong Un, ka deklaruar se vendi i tij nuk do të heqë dorë kurrë nga statusi i fuqisë bërthamore dhe do të vazhdojë ta forcojë atë në mënyrë të qëndrueshme dhe të pakthyeshme. Ai e cilësoi Korenë e Jugut si “shtetin më armiqësor” dhe paralajmëroi masa të ashpra ndaj saj për çdo veprim që dëmton Korenë e Veriut. Në fjalimin para parlamentit, Kim akuzoi Shtetet e Bashkuara për “terrorizëm shtetëror dhe agresion global” dhe njoftoi se Koreja e Veriut do të luajë një rol më aktiv kundër Uashingtonit, duke lënë të hapur mundësinë e dialogut në të ardhmen. Gjithashtu, ai theksoi se zhvillimi i arsenalit bërthamor është i justifikuar për vetëmbrojtje dhe se vendi po i jep prioritet politikës së jashtme ndaj Rusisë, ndërsa mund të pranojë lehtësime sanksionesh dhe njohje të heshtur si fuqi bërthamore.