Ylli i Barcelonës, Lamine Yamal, u kritikua ashpër nga politikanë dhe zyrtarë izraelitë për valëvitjen e flamurit palestinez gjatë festimeve të titullit të skuadrës së tij. Në mbrojtje të tij doli kryeministri i Spanjës, Pedro Sanchez, i cili e cilësoi veprimin e Yamalit si një shprehje solidariteti që ndiejnë miliona spanjollë dhe e konsideroi të padrejtë akuzën për nxitje të urrejtjes. Reagimi i Sanchez erdhi pas një postimi të Ministrit Izraelit të Mbrojtjes, Israel Katz, i cili e akuzoi Yamalin për nxitje të urrejtjes kundër Izraelit dhe popullit hebre. Gjesti i Yamalit gjeti jehonë edhe në Gaza, ku artistët pikturuan një mural që e paraqet atë duke valëvitur flamurin palestinez mbi rrënojat e kampit të refugjatëve.