Sekretari i Përgjithshëm i Kombeve të Bashkuara, Antonio Guterres, ka paralajmëruar për dy kriza të lidhura ngushtë: krizën klimatike dhe atë energjetike, të cilat po përkeqësohen nga varësia ndaj karburanteve fosile. Guterres, në fjalimin e tij gjatë Javës së Veprimit për Klimën në Londër, e përshkroi situatën si një "rrëfim të dy krizave" me origjinë të përbashkët shkatërruese. Ai theksoi se vala e të nxehtit që po përfshin Londrën është një sinjal alarmi, duke theksuar se kryeqyteti britanik "po zien" dhe kërkon veprime urgjente. Për këtë arsye, sekretari i OKB-së bëri thirrje për përshpejtimin e tranzicionit drejt energjive të pastra dhe për uljen e përdorimit të naftës, gazit dhe qymyrit.