Debati në Shtetet e Bashkuara për rikthimin e Turqisë në programin e avionëve luftarakë F-35 është intensifikuar pas takimit mes presidentëve Donald Trump dhe Recep Tayyip Erdogan, megjithëse ende nuk ka vendim zyrtar. Kongresi amerikan dhe lobet greko-amerikane po ushtrojnë presion për të mbajtur pengesat ligjore që ndalojnë furnizimin e Turqisë, duke theksuar se blerja turke e sistemit rus S-400 është arsyeja kryesore e përjashtimit të saj nga programi që nga viti 2019. Një letër e udhëhequr nga kongresistja demokrate Dina Titus dhe nënshkruar nga 18 anëtarë të Dhomës së Përfaqësuesve kërkon që administrata të respektojë ligjet ekzistuese dhe paralajmëron ndërhyrjen e Kongresit nëse përpiqet të ndryshojë politikën. Përveç çështjeve ligjore, shqetësimi kryesor i autoriteteve amerikane është rreziku që teknologjia e avancuar e avionëve F-35 të komprometohet nga pranisë së sistemit S-400 në të njëjtin mjedis, duke mundësuar kalimin e informacionit sekret në duart e Rusisë. Në këtë kontekst, po diskutohet edhe mundësia e transferimit të sistemit S-400 në një vend të tretë për të hequr pengesën ligjore, ndërsa vendimi final do të varet nga balanca mes dëshirës së Shtëpisë së Bardhë për përmirësim të marrëdhënieve me Ankaranë dhe qëndrimit të fortë të Kongresit.