Presidenti i Bjellorusisë, Aleksandër Lukashenko, ka kritikuar hapur kryeministren italiane Giorgia Meloni, duke thënë se një grua nuk është personi i duhur për të ndërmjetësuar bisedimet mes Evropës dhe Rusisë. Ai ka propozuar presidentin francez Emmanuel Macron si figurën më të përshtatshme për këtë rol, duke e cilësuar atë si "aksakalin" dhe udhëheqësin më me përvojë politike në Evropë. Lukashenko ka theksuar gjithashtu se udhëheqës të tjerë evropianë, si kancelari gjerman Friedrich Merz dhe kryeministri britanik Keir Starmer, janë ende shumë të rinj politikisht për të marrë përgjegjësi të tilla. Ai ka mohuar çdo plan për përfshirjen e drejtpërdrejtë të Bjellorusisë në konfliktin ushtarak dhe ka përsëritur se armët bërthamore do të përdoren vetëm në rast agresioni ndaj vendit të tij.