Hamideh Soleimani Afshar, mbesa e komandantit iranian Qasem Soleimani, dhe vajza e saj janë ndaluar në Shtetet e Bashkuara pas revokimit të “green card”-it nga sekretari i Shtetit Marco Rubio. Autoritetet amerikane i akuzojnë për mbështetje të regjimit iranian, deklarata anti-amerikane dhe abuzim me statusin e azilit, duke udhëtuar disa herë në Iran në kundërshtim me arsyetimin për marrjen e mbrojtjes ndërkombëtare. Afshar dhe vajza e saj kishin ndërtuar një jetë luksoze në Los Anxhelos, të cilën e ekspozonin në rrjetet sociale, një stil jetese që bie ndesh me normat strikte të Republikës Islamike të Iranit, ku sjellje të tilla mund të kenë pasoja të rënda. Lidhja familjare me Soleimanin është mohuar nga vetë familjarët në Iran, duke shtuar pikëpyetje mbi pretendimet e autoriteteve amerikane.