Gjatë katër viteve të fundit, mbi 200,000 persona kanë humbur jetën në Evropë për shkak të temperaturave ekstreme, sipas Organizatës Botërore të Shëndetësisë (OBSH). Kjo krizë e përsëritur e nxehtësisë po shkakton jo vetëm vdekje, por edhe probleme të mëdha shëndetësore dhe presion mbi sistemet shëndetësore dhe infrastrukturën. OBSH-ja thekson se shumica e këtyre vdekjeve ishin të parandalueshme dhe ka publikuar një udhëzues të ri me plane veprimi për të ndihmuar vendet dhe qytetet të përgatiten më mirë ndaj valëve të nxehtësisë. Masat e rekomanduara përfshijnë gjelbërimin e qyteteve, krijimin e qendrave të freskimit, kujdesin për të moshuarit dhe mbrojtjen e punëtorëve nga ekspozimi në diell, duke synuar zero vdekje të lidhura me temperaturat ekstreme në të ardhmen.