Përfaqësuesja e Mbretërisë së Bashkuar në OKB, Jennifer MacNaughtan, në seancën e Këshillit të Sigurimit theksoi nevojën për ulje të tensioneve në Kosovë dhe përqendrim të burimeve të OKB-së aty ku ndikimi është më i madh. Ajo kërkoi që Serbia të luajë rolin e saj në uljen e tensioneve dhe të sjellë para drejtësisë personat përgjegjës, përfshirë Radoiçiqin, si dhe të ketë llogaridhënie për sulmet ndaj KFOR-it dhe Policisë së Kosovës në maj 2023. MacNaughtan mbështeti rrugëtimin euroatlantik të Kosovës dhe inkurajoi shtetet që nuk e kanë njohur ende Kosovën të bashkohen me shumicën, duke theksuar se pavarësia e Kosovës nuk shkel të drejtën ndërkombëtare. Ajo gjithashtu kërkoi rishikim strategjik të rolit dhe financimit të UNMIK-ut për të siguruar efikasitet dhe përparim në stabilitetin afatgjatë përmes dialogut të lehtësuar nga BE-ja dhe funksionimit të institucioneve vendore.