Melania Trump, Zonja e Parë e Shteteve të Bashkuara, do të drejtojë mbledhjen e Këshillit të Sigurimit të OKB-së të hënën, pasi SHBA-ja mori presidencën mujore me rotacion. Ky është takimi i parë ku një Zonja e Parë amerikane në detyrë kryeson këtë këshill prej 15 anëtarësh. Gjatë mbledhjes, Melania do të theksojë rëndësinë e arsimit si mjet për promovimin e tolerancës dhe paqes në botë. Presidenti Donald Trump, i cili ka qenë kritik i zëshëm i OKB-së duke e cilësuar organizatën si joefektive dhe në nevojë për reforma, ka mbajtur së fundmi një ton më pajtues gjatë takimit të Bordit të Paqes, një nismë për zgjidhjen e konflikteve globale që ka ngjallur shqetësime tek disa liderë botërorë. Trump ka deklaruar se Bordi i Paqes do të mbikëqyrë funksionimin e OKB-së dhe ka premtuar forcimin dhe ndihmën financiare për organizatën që të jetë funksionale.