Kryeministrja e Italisë, Giorgia Meloni, ka reaguar pas shpërndarjes së fotografive të rreme të saj, të krijuara me inteligjencë artificiale, ku shfaqet e zhveshur. Ajo i cilësoi këto imazhe si sulme nga kundërshtarë politikë dhe theksoi rrezikun që paraqesin deepfake-t, duke theksuar se ato mund të mashtrojnë dhe dëmtojnë çdo person. Meloni pranoi se krijuesi i këtyre fotove madje e ka "përmirësuar" pamjen e saj, por nënvizoi se përdorimi i teknologjisë për shpikje dhe manipulim është i papranueshëm. Ajo bëri thirrje për kujdes dhe verifikim të informacionit para se të besohet apo të shpërndahet, duke paralajmëruar se fenomeni mund të prekë çdo individ në të ardhmen.