Kryeministrja italiane Giorgia Meloni ka shprehur kundërshtimin e saj ndaj mundësisë së tërheqjes së trupave amerikane nga Evropa, duke theksuar se Italia ka respektuar gjithmonë angazhimet ndërkombëtare, veçanërisht në kuadër të NATO-s. Ajo paralajmëroi se Evropa duhet të forcojë sigurinë dhe të rrisë kapacitetin e reagimit përballë sfidave të reja, pas deklaratave të presidentit amerikan Donald Trump për reduktimin e pranisë ushtarake në bazat evropiane, përfshirë Italinë dhe Spanjën. Meloni kritikoi gjithashtu disa akuza ndaj Italisë, duke i cilësuar si të pasakta, ndërsa theksoi se vendi ka kontribuar në misione ndërkombëtare edhe kur interesat kombëtare nuk ishin të rrezikuara drejtpërdrejt. Në një klimë të tensionuar mes SHBA-së dhe disa vendeve evropiane, Meloni do të takohet së shpejti me Sekretarin e Shtetit amerikan për të diskutuar më tej rreth situatës.