Një gjykatë federale në SHBA ka refuzuar kërkesën e kompanisë Meta për të rrëzuar padinë e ngritur nga 29 prokurorë të përgjithshëm të shteteve amerikane, të cilët akuzojnë kompaninë për krijimin e varësisë te fëmijët përmes platformave Facebook dhe Instagram. Gjykatësja Yvonne Gonzalez Rogers vendosi që pretendimet për mashtrim të konsumatorëve dhe shkelje të Ligjit Federal për Mbrojtjen e Privatësisë së Fëmijëve në Internet (COPPA) nuk mund të hidhen poshtë në këtë fazë. Meta kundërshton akuzat dhe thekson se nuk ka prova për mashtrim dhe se rrjetet sociale nuk janë të destinuara vetëm për fëmijët nën 13 vjeç, ndërsa shtetet paditëse bazohen në studime që lidhin përdorimin e këtyre platformave me probleme të shëndetit mendor si depresioni, ankthi dhe vetëlëndimi. Prokurori i Përgjithshëm i Kalifornisë e cilësoi vendimin si një fitore të rëndësishme në luftën për përgjegjësinë e kompanisë ndaj krizës së shëndetit mendor të fëmijëve amerikanë.