Rreth dy milionë muslimanë nga e gjithë bota kanë nisur ngjitjen në malin e shenjtë Arafat pranë Mekës, në kuadër të ritualit të haxhit, kushtit të pestë të fesë islame. Pas një nate adhurimesh në Mina, haxhinjtë kalojnë ditën në Arafat duke u lutur dhe kërkuar falje e mëshirë nga Allahu, duke kujtuar hutben e fundit të profetit Muhamed. Në perëndim të diellit, ata zbresin në Muzdelife dhe më pas kthehen në Mina për të kryer ritualin simbolik të gjuajtjes me gurë në drejtim të djallit, një rikrijim i ngjarjeve biblike me profetin Ibrahim. Pas këtij rituali, haxhinjtë therin kurbanë për të shënuar fillimin e festës së Kurban Bajramit, që zgjat katër ditë.