Në Zvicër u zhvillua raundi i parë i bisedimeve teknike mes Shteteve të Bashkuara dhe Iranit, me qëllim përmirësimin e marrëdhënieve dhe reduktimin e tensioneve rajonale. Megjithatë, eksperti Ilir Kulla thekson se mes palëve ekziston një mosbesim i lartë, veçanërisht për çështjen e 600 kilogramëve uraniumi të pasuruar që Irani i konsideron si sovranitet kombëtar, ndërsa ShBA kërkon eliminimin e tyre për të parandaluar prodhimin e armëve bërthamore. Në këtë kontekst, është propozuar që Agjencia Ndërkombëtare Atomike të bëjë inspektime në Iran me praninë e ekspertëve amerikanë, një hap i ri në këto bisedime. Ndërkohë, presidenti amerikan Donald Trump paralajmëroi për sulme të reja ndaj Iranit nëse ky i fundit nuk ndalon mbështetjen ndaj grupit Hezbollah, ndërsa kryetari i Parlamentit iranian reagoi duke paralajmëruar gatishmërinë për t’u përgjigjur ndaj çdo veprimi kundër vendit të tij.