Belgjika do të dislokojë rreth 30 ushtarë në Groenlandë në fillim të shtatorit si pjesë e misionit të ri të NATO-s “Arctic Sentry” ose “Arctic Watch”, që synon të forcojë praninë e aleancës në rajonin strategjik të Arktikut. Trupat belge, përfshirë pjesëtarë të Forcave Speciale, do të kryejnë stërvitje ushtarake dhe aktivitete parandaluese, duke përdorur teknologji si dronët dhe sistemet kundër dronëve në terrenin e përshtatshëm që ofron Groenlanda. Ky mision do të udhëhiqet nga Belgjika në bashkëpunim me Kanada, Danimarkë, Francë, Finlandë, Holandë, Slloveni dhe Suedi, në një kohë kur interesat strategjike të Rusisë dhe Kinës në Arktik janë në rritje. Vendimi vjen gjithashtu në sfondin e tensioneve të krijuara nga deklaratat e presidentit amerikan Donald Trump për blerjen e Groenlandës, të cilat janë kundërshtuar nga kryeministrja daneze, duke theksuar sovranitetin e ishullit dhe të drejtën e popullit të tij për të vendosur për të ardhmen.