Sistemet e mbrojtjes ajrore të NATO-s kanë rrëzuar për herë të tretë brenda pak ditësh një raketë balistike të nisur nga Irani drejt territorit të Turqisë. Raketat u shkatërruan në hapësirën ajrore turke, ndërsa banorët e qytetit Adana raportuan shpërthime të forta dhe aktivizim të sirenave në Bazën Ajrore Incirlik, që përdoret edhe nga forcat amerikane. Ministria e Mbrojtjes së Turqisë njoftoi se po merr të gjitha masat për mbrojtjen e territorit dhe ka vendosur sisteme shtesë mbrojtjeje “Patriot” në provincën Malatya. Turqia ka kërkuar shpjegime nga Irani dhe ka theksuar se baza Incirlik mbetet bazë turke, pavarësisht pranisë së trupave të huaj, duke iu përgjigjur paralajmërimeve iraniane ndaj vendeve me baza ushtarake amerikane.