Autoritetet e Parisit kanë kërkuar ndihmë nga zinxhirët e mëdhenj të supermarketeve për donacione akulli, i cili do t'u shpërndahet zjarrfikësve që po ndihmojnë personat e prekur nga valët ekstreme të të nxehtit. Zjarrfikësit francezë po përballen me një numër jashtëzakonisht të madh ndërhyrjesh, ndërsa rezervat e akullit po shterojnë me shpejtësi. Franca po përjeton një nga valët më të forta të të nxehtit në historinë e saj, me temperatura që në Paris kanë arritur rreth 40 gradë Celsius dhe parashikime për vazhdimësi të vapës edhe gjatë fundjavës. Kjo situatë ka shkaktuar rritje të ndjeshme të rasteve emergjente, përfshirë 25 raste arrestit kardiak brenda 24 orëve vetëm në Paris, duke alarmuar autoritetet dhe qytetarët.