Në Greqi, rastet e virusit të Nilit Perëndimor po shtohen me shpejtësi, duke arritur në 110 të infektuar deri më 12 gusht, nga të cilët 45 janë regjistruar vetëm gjatë javës së fundit. Sëmundja ka shkaktuar komplikacione serioze në 81 persona, ndërsa nëntë pacientë mbi 65 vjeç kanë humbur jetën dhe 16 ndodhen në terapi intensive. Autoritetet shëndetësore kanë intensifikuar masat e dezinfektimit dhe monitorimit të mushkonjave në zonat e rrezikut, duke paralajmëruar se numri i të infektuarve mund të jetë më i madh për shkak të simptomave të lehta ose mungesës së tyre. Ekspertët nxisin qytetarët dhe turistët të marrin masa mbrojtëse për të parandaluar përhapjen e mëtejshme të virusit gjatë javëve në vijim.