Danimarka, Gjermania, Austria, Holanda dhe Greqia kanë rënë dakord për krijimin e qendrave të kthimit jashtë Bashkimit Europian, ku do të transferohen migrantët me kërkesa azili të refuzuara që nuk mund të kthehen menjëherë në vendet e tyre. Qendrat pritet të jenë funksionale nga viti 2027 dhe do të operojnë në bashkëpunim me vende partnere jashtë BE-së, ndërsa negociatat për zgjedhjen e shteteve pritëse vazhdojnë, me Uganda dhe Ruandën si kandidatë të mundshëm. Ministrat e pesë vendeve theksuan se këto qendra nuk do të jenë burgje, por vende ku migrantëve do t’u ofrohet një mundësi e re, ndërsa synimi kryesor është reduktimi i migracionit të parregullt. Megjithatë, iniciativa ka ngjallur shqetësime nga organizatat për të drejtat e njeriut lidhur me kushtet e qëndrimit dhe mbrojtjen ligjore të migrantëve, ndërsa projekti do të zbatohet në përputhje me ligjin e BE-së dhe në bashkëpunim me organizata ndërkombëtare.