Bordi i Paqes ka publikuar një udhërrëfyes të detajuar për zbatimin e Planit Gjithëpërfshirës të Paqes të presidentit amerikan Donald Trump për Gazën, i cili synon të sjellë fundin e konfliktit dhe rikthimin e jetës normale në këtë rajon. Plani përfshin tërheqjen graduale të forcave izraelite, transferimin e përgjegjësive civile dhe të sigurisë në Gaza te Komiteti Kombëtar për Administrimin e Gazës (NCAG), si dhe çarmatosjen e milicive palestineze nën mbikëqyrjen e Forcës Ndërkombëtare të Stabilizimit (ISF), ku pjesë e saj është edhe Forca e Sigurisë së Kosovës. ISF do të ketë rolin e ndarjes së palëve dhe monitorimit të armëpushimit, si dhe do të mbështesë rindërtimin dhe shpërndarjen e ndihmave humanitare, duke mos kryer misione policore. Procesi i rindërtimit dhe stabilizimit do të zhvillohet nën mbikëqyrjen e Bordit të Paqes dhe NCAG-së, me synimin për të krijuar kushtet për një rrugë të besueshme drejt vetëvendosjes dhe shtetësisë palestineze.