Polonia ka hapur një qendër të re logjistike dhe riparimi ushtarak në Czosnow, e ndërtuar me ekspertizën e Mbretërisë së Bashkuar, për të forcuar mbrojtjen ajrore të vendit dhe të krahut lindor të NATO-s. Ky objekt do të mundësojë mirëmbajtje, mbështetje dhe trajnim më të shpejtë për programin PILICA+, një nismë me vlerë disa miliardë dollarë që synon krijimin e një rrjeti të integruar mbrojtjeje ajrore në Poloni. Hapja e qendrës u bë me pjesëmarrjen e ministrit britanik për Gatishmërinë dhe Industrinë e Mbrojtjes, Luke Pollard, dhe zv/ministrit polak të Mbrojtjes, Pawel Zalewski, duke theksuar angazhimin e Mbretërisë së Bashkuar për mbrojtjen e krahut lindor të NATO-s përballë agresionit në rritje të Rusisë. Sipas Pollard, kjo iniciativë jo vetëm që forcon mbrojtjen ajrore të Polonisë dhe NATO-s, por gjithashtu mbështet edhe vendet e punës në të dy vendet.