Ministri i Jashtëm i Shqipërisë, Ferit Hoxha, raportoi në Komisionin Parlamentar për Evropën dhe Punët e Jashtme se në fillim të konfliktit në Lindjen e Mesme ndodheshin 2,962 shtetas shqiptarë si rezidentë dhe 543 me qëndrim të përkohshëm. Ai njoftoi se ambasadat shqiptare kanë kontaktuar individualisht 2,511 persona, prej të cilëve 138 kanë shprehur interes për t’u larguar nga zona e konfliktit. Deri tani, 24 shtetas janë larguar individualisht, 45 janë planifikuar të largohen në mënyra të sigurta, ndërsa 703 janë asistuar dhe udhëzuar për evakuim në forma të ndryshme. Gjithashtu, 17 shqiptarë janë evakuuar me ndihmën e shteteve të treta, një praktikë që ndihmon në largimin e qytetarëve kur shteti shqiptar nuk ka kapacitete të mjaftueshme, siç ka ndodhur në rastin e Iranit ku Shqipëria nuk ka përfaqësi diplomatike.