Komisioni Evropian ka ngritur shqetësime serioze lidhur me dhënien e shtetësisë serbe për shtetasit rusë, duke theksuar se kjo mund të krijojë rreziqe sigurie për Bashkimin Evropian. Sipas zëdhënësit të KE-së, numri në rritje i rusëve që përfitojnë pasaporta serbe dhe përmes tyre mund të udhëtojnë pa viza në vendet e BE-së, është një sfidë e vazhdueshme dhe e monitoruar me kujdes. Në mesin e personave që marrin shtetësi serbe mund të jenë edhe individë që janë subjekt i sanksioneve evropiane ose konsiderohen kërcënim për sigurinë e kontinentit. Serbia, ku qëndrojnë rreth 50 mijë shtetas rusë me qëndrim të përkohshëm, është në fokus të dialogut me Bashkimin Evropian për të adresuar këtë problem të rëndësishëm.