Sekretari i Shtetit të SHBA-së, Marco Rubio, deklaroi se Irani është serioz në përpjekjet për të arritur një marrëveshje me Shtetet e Bashkuara, por kushti kryesor mbetet parandalimi i zhvillimit të armëve bërthamore nga ana e Teheranit. Ai theksoi përkeqësimin e kushteve ekonomike në Iran, duke përmendur inflacionin, vështirësitë në pagimin e pagave dhe sanksionet e vazhdueshme që rëndojnë situatën. Rubio nënvizoi se çdo marrëveshje duhet të përmbajë garanci të qarta që të pengojnë Iranin të zhvillojë armë bërthamore në çdo kohë. Megjithatë, bisedimet e zhvilluara më 11 prill në Islamabad nuk arritën të përfundojnë me një marrëveshje për t’i dhënë fund konfliktit që nisi më 28 shkurt, pavarësisht armëpushimit të ndërmjetësuar nga Pakistani.