Sekretari amerikan i Shtetit, Marco Rubio, deklaroi se Shtetet e Bashkuara po përparojnë me shpejtësi në dobësimin e kapaciteteve ushtarake të Iranit dhe presin të arrijnë objektivat e tyre brenda javësh. Ai theksoi se SHBA-ja preferon diplomacinë, por është e përgatitur për çdo skenar, duke paralajmëruar se Irani nuk do të lejohet të sulmojë anijet në Ngushticën e Hormuzit dhe se sovraniteti iranian mbi këtë zonë është i papranueshëm. Rubio shtoi se Ngushtica do të rihapet me pëlqimin e Iranit ose përmes një aleance ndërkombëtare, ndërsa çdo përpjekje për ta mbyllur atë pas operacionit ushtarak amerikan do të ketë pasoja të rënda. Ndërkohë, Irani ka refuzuar planin amerikan të paqes dhe ka vijuar sulmet me dronë dhe raketa ndaj Izraelit, duke krijuar tensione të mëtejshme në rajon.