Zyra e Bashkimit Evropian në Kosovë ka bërë me dije se Rusia po përballet me një mungesë të theksuar të fuqisë punëtore, e cila po ndikon drejtpërdrejt në vazhdimësinë e luftës në Ukrainë. Kjo situatë është shkaktuar nga një kombinim faktorësh, përfshirë lindshmërinë e ulët, vdekshmërinë e lartë, emigracionin masiv dhe humbjet e mëdha në betejë, që sipas BE-së arrijnë mbi 1.3 milionë që nga fillimi i konfliktit në vitin 2022. Për të kompensuar këtë mungesë, Rusia ka rekrutuar rreth 27 mijë luftëtarë të huaj nga më shumë se 130 vende, shumë prej të cilëve thuhet se janë detyruar ose mashtruar për t’u bashkuar në luftë. Zyra e BE-së thekson se kjo strategji mund t’i sigurojë Kremlinit vetëm një kohë të kufizuar, pasi burimet njerëzore po shterojnë si në front ashtu edhe në ekonomi.