Steve Witkoff, i dërguari i posaçëm i presidentit Donald Trump, ka bërë me dije se takimet midis SHBA-së dhe Iranit mund të zhvillohen që këtë javë, duke shprehur shpresën për një zgjidhje diplomatike në konfliktin mes tyre. Ai vlerësoi si pozitive vendimin e Trump për zgjatjen e pezullimit të sulmeve amerikane ndaj objektivave energjetike iraniane dhe theksoi se negociatat janë në zhvillim, me anije që tashmë kalojnë nëpër Ngushticën e Hormuzit. Witkoff paralajmëroi se SHBA-të nuk mund të lejojnë krijimin e një “Koreje së dytë të Veriut” në Lindjen e Mesme, duke e konsideruar këtë një kërcënim destabilizues për rajonin dhe botën. Ai nënvizoi nevojën që çdo marrëveshje të përfshijë ndalimin e pasurimit të uraniumit nga Irani, duke theksuar përkushtimin e SHBA-së për një zgjidhje paqësore.