Ambasada amerikane në Bagdad ka paralajmëruar qytetarët e saj të largohen menjëherë nga Iraku, pas një sulmi me raketa ndaj ndërtesës së ambasadës gjatë natës së së shtunës. Në njoftim theksohet se Irani dhe milicitë terroriste të lidhura me të përbëjnë një kërcënim të madh për sigurinë publike dhe interesat amerikane në vend. Ambasada u bën thirrje amerikanëve që po mendojnë të qëndrojnë në Irak të rishqyrtojnë vendimin, duke theksuar rrezikun e rrëmbimit dhe sulmeve të drejtpërdrejta ndaj tyre. Për shkak të kërcënimeve të vazhdueshme nga raketat, dronët dhe mortajat në hapësirën ajrore të Irakut, ambasada këshillon qytetarët të mos përpiqen të vizitojnë asnjë prej misioneve diplomatike amerikane në Bagdad dhe Erbil.