Shqipëria ka reaguar me ashpërsi ndaj sulmit me dron rus në qytetin Galați të Rumanisë, ku një ndërtesë banimi u godit dhe civilë mbetën të plagosur. Ministria për Evropën dhe Punët e Jashtme e ka cilësuar incidentin si një përshkallëzim serioz dhe të papërgjegjshëm nga ana e Rusisë, duke shprehur solidaritet të plotë me popullin dhe autoritetet rumune. Në deklaratë theksohet se lufta e Rusisë kundër Ukrainës po rrezikon sigurinë e civilëve edhe përtej kufijve të Ukrainës, duke përhapur pasojat e saj në rajon. Shqipëria konfirmon angazhimin e saj për të qëndruar pranë aleatëve dhe partnerëve ndërkombëtarë në mbështetje të paqes, sigurisë dhe respektimit të së drejtës ndërkombëtare.