Ministri i Jashtëm i Shqipërisë, Ferit Hoxha, zhvilloi një bisedë telefonike me homologun ukrainas, Andrii Sybiha, duke ripërsëritur dënimin e fortë ndaj agresionit rus në Ukrainë dhe mbështetjen e palëkundur për sovranitetin dhe integritetin territorial të Ukrainës. Hoxha theksoi se Shqipëria qëndron në solidaritet të plotë me Ukrainën dhe mbështet një paqe të drejtë dhe të qëndrueshme, e cila duhet të respektojë zgjedhjen e popullit ukrainas dhe të koordinohet me partnerët ndërkombëtarë, veçanërisht Shtetet e Bashkuara. Nga ana e tij, Sybiha vlerësoi marrëdhëniet miqësore dhe bashkëpunimin e ngushtë midis dy vendeve, si dhe mbështetjen e Shqipërisë në Këshillin e Sigurimit të OKB-së gjatë anëtarësimit jo të përhershëm të vendit tonë. Në përfundim të bisedës, Hoxha ftoi ministrin ukrainas për të marrë pjesë në takimin ministerial Ukrainë-Evropa Juglindore që do të mbahet në Tiranë në qershor, duke theksuar rëndësinë e këtij eventi për thellimin e bashkëpunimit dhe përpjekjeve për paqe dhe stabilitet në rajon.