Të paktën shtatë persona kanë humbur jetën pas një sulmi ndaj konsullatës amerikane në Karaçi, Pakistan. Ngjarja ndodhi gjatë përleshjeve me armë mes forcave të rendit dhe anëtarëve të Organizatës Studentore Imamia, një grup shiit pro-iranian, të cilët tentuan të hynin në objektin e konsullatës. Protestat u organizuan nga grupet shiite që përbëjnë rreth 20% të popullsisë së Pakistanit, ndërsa paralajmërohen protesta të tjera në qytete të tjera të vendit. Si pasojë, është rritur niveli i sigurisë në konsullatën amerikane në Peshavar dhe në Ambasadën amerikane në Islamabad.