Në fushën e golfit të tij në Doral, Florida, u përurua një statujë gjigante prej ari e Donald Trumpit, e lartë rreth shtatë metra, që e paraqet me grushtin e ngritur, në pozën e njohur pas atentatit në Butler të Pensilvanisë. Ceremonia u drejtua nga pastori ungjillor Mark Burns, i cili e përshkroi statujën si një simbol të qëndrueshmërisë, lirisë, patriotizmit dhe forcës, duke theksuar se ajo nuk është një idhull i rremë, por një festë e jetës dhe një kujtesë e dorës së Zotit mbi Trumpin. Burns, anëtar i organizatës Pastors for Trump, nënvizoi mbrojtjen hyjnore ndaj presidentit dhe përpjekjet e shumta për vrasjen e tij që ai i ka mbijetuar. Gjatë ngjarjes, u dëgjua edhe zëri i Trump, i cili falënderoi pastorin dhe të gjithë të pranishmit, duke e cilësuar statujën si një akt dashurie.