Një grup hakerësh nga Serbia, i njohur si INF Group, ka kryer një sulm të madh kibernetik ndaj platformës kroate FinInfo.hr dhe një institucioni shëndetësor në Kroaci, duke publikuar mijëra të dhëna sensitive në “dark web”. Sipas ekspertit kroat të sigurisë kibernetike, Leon Juraniq, janë publikuar rreth 34 mijë të dhëna nga FinInfo.hr dhe rreth 9 mijë të dhëna të pacientëve nga institucioni shëndetësor, përfshirë diagnoza dhe informacione personale. INF Group ka marrë përgjegjësinë edhe për një sulm të mëparshëm ndaj sistemit të drejtësisë kroate dhe ka paralajmëruar se kjo është vetëm faza fillestare e sulmeve të tyre. Ndërkohë, Instituti Kroat i Sigurimeve Pensionale ka njoftuar se ka neutralizuar një incident të sigurisë në aplikacionin e tyre dhe ka rikthyer komunikimin e sigurt me përdoruesit.