Autoritetet e Kuvajtit raportuan dëme të konsiderueshme në një objekt të rëndësishëm të industrisë së naftës pas sulmeve të përsëritura iraniane, ku disa persona, përfshirë zjarrfikës dhe punëtorë, mbetën të plagosur dhe morën trajtim mjekësor. Sulmet goditën gjithashtu dy lokacione të tjera, përfshirë një central elektrik dhe një impiant për desalinizimin e ujit, duke shkaktuar zjarre dhe ndërprerje në prodhimin e energjisë. Ekipet e emergjencës dhe ato të sektorit të naftës u angazhuan intensivisht për të vënë nën kontroll flakët, ndërsa Ministria e Punëve të Jashtme të Kuvajtit dënoi ashpër sulmet, duke i cilësuar ato si shkelje flagrante të së drejtës ndërkombëtare. Në përgjigje, ushtria iraniane pranoi se kishte kryer sulme ndaj objektivave ushtarake në Kuvajt dhe Jordaninë lindore, duke i lidhur veprimet me hakmarrjen për bombardimet amerikane në territorin iranian.