Dita e parë e Fitër Bajramit këtë vit shënohet nën hijen e tensioneve dhe sulmeve në Lindjen e Mesme, duke zbehur atmosferën festive dhe solidaritetin tradicional të kësaj periudhe. Raketa iraniane kanë goditur impiantin kryesor të përpunimit të gazit në Ras Laffan të Katarit, si dhe instalacione nafte dhe petrokimike në Arabia Saudite dhe Kuvajt, pavarësisht mohimeve të Iranit për goditje ndaj objekteve civile. Në Ngushticën strategjike të Hormuzit, trafiku detar mbetet i bllokuar, ndërsa Irani kontrollon kalimin e anijeve dhe kërcënon me sulme me dronë dhe raketa. Ekspertët paralajmërojnë se këto tensione dhe sulme po ndikojnë rëndë në furnizimin global me energji dhe në ekonominë botërore, duke krijuar pasiguri në tregjet ndërkombëtare.