Ushtria e Shteteve të Bashkuara ka kryer një sulm ndaj një anijeje të dyshuar për trafik droge në Oqeanin Paqësor, ku mbetën të vrarë dy persona. Komanda Jugore e SHBA-së njoftoi se anija operonte përgjatë rrugëve të njohura të trafikut të drogës në Paqësorin Lindor dhe se sulmi ishte pjesë e operacionit “Shtiza Jugore”, i nisur në fillim të shtatorit për të goditur kartelet e drogës në Amerikën Latine. Megjithatë, administrata amerikane nuk ka paraqitur prova përfundimtare që të gjitha anijet e goditura ishin me të vërtetë të përfshira në trafik, duke ngritur shqetësime për mundësinë e vrasjeve jashtëgjyqësore. Që nga fillimi i operacionit, më shumë se 200 persona janë vrarë në sulme në Paqësorin Lindor dhe Detin e Karaibeve, ndërsa ekspertë dhe organizata të të drejtave të njeriut kërkojnë transparencë dhe respektimin e ligjit ndërkombëtar.