Irani ka paralajmëruar se do të përdorë forcën e plotë për të mbrojtur Ngushticën e Hormuzit dhe do të sulmojë çdo forcë ushtarake të huaj që përpiqet të hyjë në këtë rrugë kyçe detare, veçanërisht ushtrinë amerikane. Komandanti i Shtabit Qendror Khatam al-Anbiya, gjeneralmajor Ali Abdollahi, ka theksuar se ngushtica është nën kontrollin e forcave iraniane dhe çdo kalim duhet të koordinohet me ta për të shmangur rrezikun ndaj anijeve tregtare dhe tankerëve të naftës. Paralajmërimi vjen pas njoftimit të presidentit amerikan Donald Trump për nisjen e një operacioni ushtarak, të quajtur “Project Freedom”, që synon të lirojë anijet e bllokuara në këtë zonë, me mbështetje të fuqishme ushtarake nga SHBA-ja. Situata mbetet e tensionuar, ndërsa forcat amerikane përgatiten të mbështesin kalimin e anijeve, ndërsa Irani paralajmëron për pasoja serioze në rast ndërhyrjeje ushtarake.