Një tërmet i fuqishëm ka goditur bregdetin verior të Japonisë, me epiqendrën në bregun lindor të Iwate-s dhe në një thellësi prej rreth 50 kilometrash. Lëkundjet janë ndjerë edhe në Tokio, por nuk ka pasur raportime për dëme materiale apo të lënduar. Autoritetet japoneze kanë konfirmuar se centralet bërthamore, përfshirë Fukushima Daiichi dhe impiantin në Aomori, nuk kanë shfaqur asnjë anomali pas tërmetit. Japonia, e vendosur në “Unazën e Zjarrit” të Paqësorit, është një nga zonat më të rrezikuara nga tërmetet në botë, ndërsa ngjarja vjen një ditë pas dy tërmeteve shkatërruese në Venezuelë që shkaktuan dhjetëra viktima dhe qindra të plagosur.