Ambasadorët e shteteve anëtare të Bashkimit Evropian nuk dhanë miratimin për hapjen e Kapitullit të 3-të në negociatat e anëtarësimit me Serbinë gjatë takimit të Komitetit të Përfaqësuesve të Përhershëm (COREPER) në Bruksel. Tetë vende, përfshirë Holandën, Belgjikën, Bullgarinë, Kroacinë, Suedinë dhe tri shtetet baltike, shprehën kundërshtimin e tyre, duke bllokuar kështu avancimin e Serbisë në procesin e integrimit evropian. Komisioni Evropian, përmes komisioneres për Zgjerimin Marta Kos, kishte rekomanduar hapjen e këtij kapitulli duke vlerësuar përparime në reforma, sidomos në fushën e sundimit të ligjit dhe medias, por shqetësimet për mungesën e përafrimit të Serbisë me politikën e jashtme të BE-së, veçanërisht për sanksionet ndaj Rusisë, mbeten pengesë kryesore. Çështja pritet të diskutohet edhe në mbledhjen e Këshillit të BE-së për Punë të Jashtme më 13 korrik, por aktualisht nuk ka shenja se qëndrimi i vendeve kundërshtuese do të ndryshojë.