Presidenti amerikan Donald Trump ka rikthyer retorikën e ashpër ndaj Iranit duke publikuar në rrjetin e tij social Truth Social një seri imazhesh të krijuara me inteligjencë artificiale, që tregojnë shkatërrimin e anijeve dhe infrastrukturës energjetike iraniane. Këto postime vijnë pas një armëpushimi të përkohshëm dhe një periudhe qetësie relative në Lindjen e Mesme, pas 13 ditësh përballjesh intensive mes SHBA-së dhe Iranit. Gjatë fundjavës, Pentagoni ndaloi fushatën e bombardimeve dhe Irani pezulloi sulmet ndaj vendeve fqinje me baza amerikane, duke deklaruar se do të respektojë armëpushimin për aq kohë sa SHBA-të nuk ndërmarrin veprime të reja ushtarake. Megjithatë, postimet e Trumpit me përmbajtje të gjeneruar nga inteligjenca artificiale interpretohen si një kërcënim i ri dhe një sinjal për rifillimin e tensioneve në rajon.