Administrata e Presidentit amerikan Donald Trump po planifikon ndërtimin e një baze ushtarake në Rripin e Gazës me kapacitet për rreth 5,000 trupa, e cila do të shtrihet në më shumë se 1 kilometër katror tokë. Kjo bazë do të shërbejë si qendër operative për Forcën Ndërkombëtare të Stabilizimit (ISF), një forcë shumëkombëshe e krijuar nga Bordi i Paqes, i cili do të qeverisë përkohësisht Gazën dhe kryesohet nga Trump, me pjesëmarrjen aktive të dhëndrit të tij, Jared Kushner. Kompleksi ushtarak do të përfshijë 26 kulla vrojtimi të blinduara, poligon për armë të lehta, bunkerë dhe depo për pajisje, dhe do të jetë i rrethuar me tela me gjemba në një zonë të thatë dhe të sheshtë në jug të Gazës, e mbuluar me mbetje metali nga bombardimet e mëparshme.