Presidenti i SHBA-së, Donald Trump, ka shkarkuar sekretaren e Departamentit të Sigurisë Kombëtare, Kristi Noem, pas kritikave të shumta për menaxhimin e politikave të emigracionit dhe reagimin ndaj fatkeqësive. Vendimi u bë i ditur përmes një postimi në rrjetin social Truth Social, ku u njoftua se në vend të saj do të emërohet senatori republikan nga Oklahoma, Markwayne Mullin, i cili pritet të marrë detyrën më 31 mars. Mullin deklaroi se do të fokusohet në mbrojtjen e atdheut dhe se ka biseduar me Trump pak para njoftimit zyrtar. Ndërkohë, Noem nuk largohet plotësisht nga administrata, pasi do të marrë një rol të ri si e dërguar speciale për iniciativën e sigurisë në hemisferën perëndimore, “The Shield of the Americas”. Ky ndryshim konsiderohet një nga më të rëndësishmit në kabinetin e Trump gjatë mandatit të tij të dytë.