Ukraina ka kërkuar ndihmën e Turqisë për të organizuar një takim mes presidentit ukrainas Volodymyr Zelensky dhe presidentit rus Vladimir Putin, në përpjekje për të ringjallur bisedimet e paqes pas më shumë se katër vitesh konflikti. Ministri i jashtëm ukrainas, Andriy Sibiha, ka bërë të ditur se kjo kërkesë i është drejtuar edhe disa kryeqyteteve të tjera, ndërsa Ukraina është e gatshme të pranojë çdo vend neutral për organizimin e takimit, përveç Rusisë dhe Bjellorusisë, për shkak të rolit të tyre në konflikt. Kremlini ka shprehur gatishmërinë për të pritur Zelenskyn në Moskë, por presidenti ukrainas e ka refuzuar këtë mundësi. Deri më tani, nuk ka pasur një përgjigje të qartë nga ana e Turqisë, ndërsa diplomacia ndërkombëtare vazhdon të kërkojë një zgjidhje për luftën që ka hyrë në vitin e pestë.