Rajoni Europian i Organizatës Botërore të Shëndetësisë ka shënuar një rritje të ndjeshme të vaksinimit kundër gripit gjatë 15 viteve të fundit, me dyfishimin e dozave të administruara që nga sezoni 2008-2009 deri në 2021-2022. Megjithatë, pabarazitë mes vendeve me të ardhura të larta dhe atyre më të ulëta mbeten të thella, ku vendet e pasura shpërndajnë mesatarisht 140 doza për 1000 banorë, ndërsa vendet më pak të zhvilluara vetëm 14.6. Mbulimi i vaksinimit tek të moshuarit, që përbëjnë 70% të vdekjeve nga gripi, është 55% në vendet e pasura dhe vetëm 5% në ato më pak të zhvilluara, ndërsa objektivi global për vaksinimin e 75% të kësaj grupmoshe është arritur vetëm nga katër vende europiane. Në Shqipëri, ku në vitin 2025 u ofruan 280 mijë doza falas për popullatën me rrezik të lartë, ekspertët theksojnë nevojën për rritjen e vaksinimit, duke vënë në dukje sfidat kryesore si aksesi, informimi dhe besimi i publikut për të mbrojtur grupet më vulnerabël.