Franca po përballet me një valë të nxehti tropikal që ka sjellë temperatura rekord mbi 40 gradë Celsius, duke arritur në disa zona deri në 45 gradë. Kjo situatë ekstreme ka shkaktuar panik te qytetarët, të cilët janë përplasur dhe kanë krijuar rrëmujë në dyqane për të siguruar ventilatorë dhe kondicionerë, ndërsa raftet me pajisje ftohëse janë boshatisur brenda pak minutash. Në disa qytete, përfshirë Chambray-lès-Tours dhe Parisin, autoritetet kanë vendosur masa të jashtëzakonshme, si ndalimi i përkohshëm i konsumimit të alkoolit në hapësira publike, për të mbrojtur shëndetin e qytetarëve. Përveç vështirësive në furnizim, vala e të nxehtit ka shkaktuar edhe pasoja tragjike, me 55 persona të raportuar si viktima, ndërsa në rrjetet sociale po shpërndahen edhe pamje dhe histori të pazakonta, si ajo e një banori parisien që ka skuqur vezë në dritaren e banesës së tij për shkak të temperaturave të larta.