Presidenti ukrainas Volodymyr Zelensky ka kërkuar që Ukraina të anëtarësohet në Bashkimin Evropian në vitin 2027, duke e konsideruar këtë datë shumë të rëndësishme për vendin e tij dhe duke paralajmëruar se Rusia nuk duhet ta bllokojë këtë proces. Gjatë një konference për shtyp në Kiev, ku morën pjesë edhe presidentja e Komisionit Evropian Ursula von der Leyen dhe presidenti i Këshillit Evropian Antonio Costa, Zelensky theksoi nevojën për një rrugë të përshpejtuar drejt anëtarësimit. Megjithatë, von der Leyen u shpreh me kujdes për këtë kërkesë, duke thënë se Ukraina është në rrugën e duhur për t’u bërë anëtare, por nuk mund të konfirmojë një datë të saktë për anëtarësimin. Ajo theksoi mbështetjen e BE-së për qëllimin e Ukrainës, por pa premtuar një afat konkret, duke lënë të hapur mundësinë e një procesi të gjatë.