Një zjarr i madh ka përfshirë komunën Peschici në rajonin e Pulias, në jug të Italisë, duke detyruar evakuimin e më shumë se 400 turistëve përmes detit, pasi kjo ishte rruga e vetme e mundshme për largim. Operacionet e shpëtimit vijojnë me përfshirjen e gjashtë anijeve të Rojes Bregdetare, tri anijeve të Rojes Doganore dhe dhjetëra varkave private, ndërsa pritet evakuimi i rreth 300 personave të tjerë. Një avion “Canadair” dhe automjete zjarrfikëse janë angazhuar në luftën kundër flakëve, ndërsa situata aktualisht mbahet nën kontroll dhe zjarri nuk kërcënon banesat. Kryetari i komunës, Luigi d’Arenzo, siguron se po punohet intensivisht për menaxhimin e situatës, ndërsa një re tymi e madhe është e dukshme edhe në distanca të largëta.