Zvicra ka vendosur të dislokojë rreth 4.000 trupa ushtarake brenda territorit të saj për të forcuar sigurinë në prag të samitit të G7-ës, që do të mbahet në qytezën franceze Evian-les-Bains, pranë kufirit zviceran. Ky samit, i cili do të zhvillohet nga 15 deri më 17 qershor, do të bashkojë udhëheqësit e ekonomive më të mëdha botërore, duke përfshirë edhe presidentin amerikan Donald Trump. Për shkak të afërsisë gjeografike me kufirin dhe pritshmërisë për protesta, autoritetet zvicerane kanë planifikuar bashkërendim të ngushtë mes forcave civile dhe ushtarake për të mbrojtur infrastrukturën kritike, si Aeroportin e Gjenevës dhe rrugët kyçe të transportit. Forcat ajrore do të shtojnë patrullimin dhe do të vendosin masa kufizuese në hapësirën ajrore gjatë periudhës 10-19 qershor, duke përfshirë mbrojtje kundër dronëve dhe kërcënimeve bërthamore, biologjike dhe kimike.